O NENO CAN entra na LISTA DO CENTRO IBBY DE DOCUMENTACIÓN PARA NENOS CON DIFICULTADES ESPECIAIS

Posted by franciscocastro - 10/01/13 at 03:01 p.m.

Onte chegoume a nova, agradabilísima, de que o Centro IBBY de Documentación para Nenos con Dificultudes Especiais, con sede en Oslo, decidira, despois da análise feita polos seus expertos, incluir O NENO CAN, de Fina Casalderrey e Francisco Castro, na súa Lista Outstanding Books 2013, ou o que é o mesmo, na súa lista de libros destacados polo seu tratamento da discapacidade. Isto implica, ademais dun recoñecemento internacional para o noso texto, entrar dentro dun Catálogo que recolle as mellores publicacións do mundo sobre esta temática e que se edita en varias linguas, e formar parte dunha exposición que se inaugura na Feira de Boloña e que terá a súa sede permanente en Oslo despois de itinerar por distintas capitais do mundo.

O Centro IBBY de Documentación para Nenos con Dificultades Especiais foi creado en 1985 no Norwegian Institute for Special Education da Universidade de Oslo e ofrece servizos de información, consulta e documentación para organizacións, investigadores, docentes, estudantes, bibliotecarios, editores, autores, ilustradores, encargados de formular políticas e os medios que traballan con nenos e mozos con necesidades especiais.

Grazas aos seus proxectos internacionais, que contan co apoio de UNESCO, de varias editoriais e dos membros de IBBY, o Centro posúe unha gran colección de libros para nenos e mozos e tamén para adultos con dificultades de linguaxe e de lectura. Os libros expóñense en congresos, feiras do libro e diversos eventos.

Os tres títulos que dende Oslo se seleccionaron, do estado español, son dous en catalán e este texto en galego.

Imaxinade o contentos que estamos Fina e eu.

Os comentarios están pechados.