DECONSTRUÍNDO A MARCO POLO (e 3)

Posted by franciscocastro - 11/10/10 at 10:10 p.m.

Para rematar con estas reflexións arredor de Marco Polo, direi que conseguiu unha das cousas máis difíciles de lograr por calquera ser humano: ser soñado a través do tempo por centos de persoas en moi distintos lugares do mundo. Quero dicir, que a súa xesta, sobre todo (eu tentei transmitir isto no meu libro), serviu de inspiración para que outros moitos, dende hai séculos, quixesen viaxar, coñecer o resto do mundo, namorar da idea de que a vida é tan poderosa e tan fermosa que non paga a pena vivir e morrer no mesmo sitio.

A viaxe de Marco Polo, e sobre todo, o feito de que a deixase escrita, é unha mensaxe esperanzada para todos os que nacemos despois e que se resume máis ou menos nunha única idea feliz: o mundo é grande, marabilloso, e digno de ser visto. Só tes unha vida. Daquela, vai a por ese mundo que está a agardar por ti.

Os comentarios están pechados.