TEÑO A LITERATURA
Posted by franciscocastro - 02/12/09 at 10:12 p.m.
Teño a literatura. Diante do cambio climático e da estupidez humana que non vai ser quen de parala. Diante de tantos lobos que ouvean xélidos para nos papar. Diante desta proposta de cultura pret-a-porter, ou como se escriba, que nos quere volver máis idiotas e estraños no noso propio país, teño a literatura. Diante da especulación matemática pensada milimetricamente para procurar a nosa infelicidade, diante dos soños castrados, que nos cortan nada máis nacer, diante dos contos mal contados polos que viven do conto, eu teño a literatura.
E doume unha volta por outros territorios. E prográmome para desprogramarme, deseducarme e, se cadra, para desobedecerme. E sei de liberdades e de felicidades. E de arelas inesgotables de letras e letras e máis letras.
Hoxe, nesta noite de chuvia e melancolía, eu teño a literatura.
Decembro 2nd, 2009 at 10:46 p.m.
Hoxe, nesta noite de chuvia e melancolía, eu léoo a vostede.
Decembro 2nd, 2009 at 11:13 p.m.
Canto llo agradezo.
Decembro 3rd, 2009 at 12:16 a.m.
Chegar do Insti, de ver tanta incompetencia, tanta mala educación ou tanta falta de, ou tanta deseducación ou tanto cerebro perdido ou por perderse…chegar a casa e poder ler que inda me queda un reducto no que sobrevivir ó naufraxio, faime sentir mellor e menos náufraga…ou máis
todo depende -como boa galega- de como se mire… Gracias por lembrarmo
Decembro 3rd, 2009 at 12:33 p.m.
Un raio de sol e ademais da literatura teredes milleiros de cousas máis! Arriba eses ánimos, que o mundo está cheo de cousas fermosas!! A literatura é unha delas, imprescindible, por suposto…
Decembro 3rd, 2009 at 12:37 p.m.
E tamén para tender pontes entre os corazóns, temos a literatura. Soa un pouquiño cursi, é certo, mais nada me fai sentir máis integrado nun clube de boa xente coas portas permanente abertas ao descoñecido.