VARGAS LLOSA, DESTA VEZ SI

Posted by franciscocastro - 16/07/07 at 07:07 a.m.

Estou disposto a aceptar que o feito de que non me dea gustado Mario Vargas Llosa ten que ser un problema meu, algo que me pasa a nivel mental, sen dúbida algo que me falta por dentro, por aí nos miolos. Entusiasma a millóns de lectores en todo o mundo. Daquela, debo de ser un rariño.
Cando recoñezo estas cousas, que non me chegan as súas obras, nin os seus artigos, nin sequera os estudos críticos, seica maxistrais, que ten feito sobre outros escritores, decote todos me miran mal, como na cantiga.
Será, insisto, defecto meu.
Sen embargo, o outro día lin unha frase escrita por el que non podo deixar de compartir: Creo que los gobiernos tienen la obligación de crear sociedades en las que la lectura ocupe una función importante. É dicir, xusto o que os gobernos non fan. Máis ben todo o contrario.
Daquela, xa podo dicir que, cando menos, hai un texto de Mario Vargas Llosa que si que me gustou.

Os comentarios están pechados.